Akong nahinumdoman nga sila makasubay pa sa ilang mga pamaagi ug mga nabuhat saona. Ug kami hugot kaayo ang pagpaminaw kanila susama sa pagpaminaw sa mga sikat karon nga awit ug telenobela. Naa pa na karon?
Kaming mga bata saona nituo nila nga ang pagpanulod o pag-nail cutter sa gabii makatunglo sa imong pamilya. Diha pay higayon nga ako nakit-an akong agaw nga bata usab saona nga nagbuhat niana unya ako gibuyag kay lage makatunglo kanana sa pamilya. Ako pa siya giingnan, "Hoy, bantay ka do ganahan ka mangamatay ta?" Ug nahadlok siya.
Karon murag lain na gyud siguroy itubag sa mga bata.
Hugot sad nga gibawal sa mga Lolo ug Lola, saona, ang pagpanilhig, pagkaligo, pagkaon ug mga pinirito ug pagkanta-kanta kon adunay gihaya sa balay. Naa pa ba na karon? Bag-o palang ko nakakita naay gihaya unya nag-videoke sila sa balay mismo sa gihaya unya pag dayong lubong "Boom Tarat Tarat" pa ang gipatukar. Unsa nani?
Bag-o palang nigawas ang Blood Moon o ang pulang bulan. Ingon ang mga Lolo ug Lola saona ang bulan daw gikaon sa bakunawa mao nga pula. Nakahinumdom pako saona naay mga Lolo ug Lola mag-dokdok ug bisan unsa sa gawas unya magsyaget ug "Iuli ang bulan! Iuli ang bulan!" Karon, murag muingon naman lang ta "Wow, kanindot sa bulan. Mag-selfie ta!"
Daghan pa kaayong mga estorya ang mga Lolo ug Lola saona nga karon murag gibaliwala na o kataw-anan nalang. Kabalo ko, nag-hunahuna ka karon sa imo kaugalingon kong nag-syaget sad kag "Iuli ang bulan! Iuli ang bulan!", mo-unsa kaha ang uban? Mura kag boang, diba?
Kataw-anan pero mao na sila saona mga Lolo ug Lola nga nagsubay sa ilang kaugalingong naandan. Kadaghanan wala na karon o bugal-bugalan nalang pero ato sad unta huna-hunaon nga kon wala ang mga maong estorya nila Lolo ug Lola, unsa keha atong kinabuhi karon ug saona. Usa pa, daghang sad nga mga estorya nila ang tinuod nga bisan ang teknolohiya o siyensa dili kalupig.
Kamo, unsa ang mga estorya sa inyong Lolo ug Lola? I-comment sa ubos para maka-hunahuna sad ta.
